Զամբյուղում ապրանք չկա:
iOS 18 և արհեստական բանականություն
Apple-ը, հունիսի 10-ին, ներկայացրեց նոր՝ iOS 18 օպերացիոն համակարգի բետա տարբերակը։ iOS 18-ը կենտրոնանում է արհեստական ինտելեկտի և գեներատիվ AI հնարավորությունների վրա: Ինչպես iPad-ում և Mac-ում, այնպես էլ iPhone-ում կներդրվի Apple Intelligence-ը: Apple-ի և OpenAI-ի միջև համաձայնության արդյունքում, ChatGPT արհեստական ինտելեկտի չաթբոտն արդեն կլինի iPhone սմարթֆոններում։ Եվ այսպես, ի՞նչ էական փոփոխություններ ակնկալել Apple-ի նոր օպերացիոն համակարգից:
Կարգավորելի էկրան
iOS-ի գտատերերը, վերջապես, հնարավորություն կունենան հավելվածների պատկերակները տեղադրել այնտեղ, որտեղ ցանկանում են։ Հնարավոր կլինի նաև հավելվածները թաքցնել հիմնական էկրանից։ Կարող եք նաև փոխել պատկերակների գույնը: Գիշերային ռեժիմում դրանք ավելի մուգ կդառնան։ Android ՕՀ-ի օգտատերերն, իհարկե, այս առումով չեն հասկանա iOS-ցիների ուրախությունը։
Գաղտնիություն
iOS 18-ում բարելավվել է գաղտնիությունը. օգտատիրոջ ընտրած ցանկացած հավելվածի գործարկման համար կպահանջվի Face ID նույնականացում: Այս ֆունկցիան օգտատերերին հնարավորություն կտա արգելափակել ներկառուցված iPhone հավելվածները, ինչպիսիք են Mail, Messages, Notes, Phone, Photos, Safari, Settings և այլն՝ ապահովելով գաղտնիության և անվտանգության լրացուցիչ մակարդակ: Հավելվածն ապակողպելու համար կպահանջվի Face ID նույնականացում, և, հավանաբար, գործառույթը կաշխատի նաև Touch ID-ի կամ iPhone-ի գաղտնաբառի հետ: Այս փոփոխությունը, կարծում ենք, շատերի համար առաջնահերթություն է։
Արբանյակային հաղորդակցություն
Apple-ը նաև կընդլայնի iPhone-ի արբանյակային հաղորդակցության հնարավորությունները՝ ավելացնելով բջջային ծառայության բացակայության դեպքում արբանյակի միջոցով հաղորդագրություններ փոխանակելու հնարավորությունը: iOS 18-ի նոր գործառույթը թույլ կտա օգտվողներին, ինտերնետ կապի բացակայության դեպքում, ուղարկել տեքստային հաղորդագրություններ և սթիքերներ արբանյակային կապի միջոցով՝ Երկրի ցանկացած կետից:
Նոր գործառույթը հատկապես արդիական է ճանապարհորդների, լեռնագնացների, հետազոտողների և էքստրեմալ սպորտի սիրահարների համար: Մինչ այժմ նրանք ստիպված էին ապավինել թանկարժեք և մեծածավալ արբանյակային հեռախոսներին՝ ցանցի ծածկույթի տարածքից դուրս հաղորդակցվելու համար: Այժմ բավական կլինի ձեզ հետ վերցնել միայն iPhone։
Ճամփորդի ուղեցույց
Եվս մեկ կարևոր նորույթ ակտիվ ժամանցի սիրահարների համար։ Թարմացված «Քարտեզներ» հավելվածը կառաջարկի հատուկ երթուղիներ, որոնք թույլ կտան ընտրել ճամփորդելու հատուկ ճանապարհներ, ինչպես նաև տեղագրական քարտեզներ, որոնք ցույց են տալիս արահետներ, բարձրություններ և տեսարժան վայրեր:
Փոստի տեսակավորում
Բարելավումները չեն շրջանցել նաև ներկառուցված Mail հավելվածը։ Apple-ը կավելացնի հաղորդագրությունների ավտոմատ տեսակավորումն ըստ կատեգորիաների՝ լուրեր, վճարումներ, թարմացումներ և այլն: Ճիշտ այնպես, ինչպես Gmail-ը: Մեքենայական ուսուցման միջոցով ներկառուցված Mail հավելվածը կարող է դասակարգել էլ.փոստերը կատեգորիաների, ինչպիսիք են՝
- Առաջնային (Primary) – ցուցադրում է ժամանակային առումով զգայուն հաղորդագրություններ, նամակներ այն մարդկանց կողմից, ովքեր կարող են ծանոթ լինել օգտագիրոջը, և այլ կարևոր տեղեկություններ
- Գործարքներ (Transactions)- էլ.փոստի կատեգորիա՝ անդորրագրերի և պատվերի հաստատման համար
- Թարմացումներ (Updates) – տեղեկագրեր և սոցիալական լրատվամիջոցների ծանուցումներ
- Ակցիաներ (Promotions )- մարքեթինգի և վաճառքի հետ կապված էլ. նամակներ
Բացի այդ, Siri֊ն կկարողանա վերլուծել մուտքային հաղորդագրությունները և պատասխանել դրանց, եթե դուք ծուլանում եք կամ զբաղված եք։
Խաղերի նոր ռեժիմ
Game Mode-ը նվազագույնի է հասցնում ֆոնային ակտիվությունը՝ ապահովելով առավելագույն արդյունավետություն, ինչպես նաև նվազագույն հետաձգում խաղի ժամանակ, երբ օգտագործվում է գեյմփադ կամ AirPods ականջակալներ:
Արհեստական բանականություն
Apple-ը ներկայացրել է նաև Apple Intelligence-ը. արհեստական բանականության համակարգ, որը կդառնա iOS 18-ի (ինչպես նաև MacOS-ի) մաս: Նեյրոնային ցանցը ավելի լավ կհասկանա օգտագործողին և նրա անձնական համատեքստը։ Արհեստական բանականության բազմաթիվ հնարավորություններից են Messages-ում հեշտությամբ պատկերներ ստեղծելու, տարբեր հարցերի պատասխանելու, տեքստի ամփոփում տրամադրելու հնարավորությունը և շատ ավելին։ iOS-ն այժմ կկարողանա ավելի խելամտորեն առաջնահերթություն տալ ծանուցումներին՝ ցույց տալով ամենակարևորները նախքան ամբողջական ցանկին անցնելը:
Անջատման կետ
Կառավարման կենտրոնում, վերևի աջ մասում, այժմ կա iPhone-ն անջատելու առանձին կոճակ: Նաև ձախ կողմում ավելացվել է գումարած նշան՝ վիջեթներ և պատկերակներ ավելացնելու համար, որպեսզի ձեր մատը չսեղմեք ազատ գոտում։
Ավելի խելացի Siri օգնական
Siri-ին նույնպես հասանելի է Apple Intelligence AI-ի գործառույթները: Apple-ի օգնականը կաջակցի ավելի բնական փոխազդեցություններ և կկարողանա պատասխանել հարցերի շատ ավելի լայն շրջանակի։ Siri-ն այժմ հիշում է օգտատիրոջ ողջ տեղեկատվությունը և կարող է օգնել ձեզ՝ գտնելու անհրաժեշտ տվյալները հաղորդագրություններում, նշումներում, լուսանկարներում․ օրինակ, վարորդական իրավունքի լուսանկարը, կամ, ասենք, ձեզ ուղարկված բաղադրատոմսը: Ի դեպ, դուք կարող եք խնդրել Siri-ին՝ գտնել ձեզ անհրաժեշտ լուսանկարը՝ պարզապես նկարագրելով այն։
Ե՞րբ հասանելի կլինի նոր ՕՀ-ն
iOS 18-ը հասանելի կլինի այս աշնանը՝ հաջորդ սերնդի iPhone-ի շնորհանդեսից հետո: Ծրագրավորողները կկարողանան ներբեռնել ՕՀ-ի նախնական տարբերակները այս ամռանը։ Ակնկալվում է, որ iOS 18-ը համատեղելի կլինի iPhone-ների մեծ մասի հետ, որոնք կարող են աշխատել iOS 17-ով․ հավանաբար, սկսած iPhone XR-ից և ավելի նոր մոդելներից: Թվային աշխարհի նորություններն առաջինն իմանալու համար հետևիր բլոգի թարմացումներին։
