Ձեր երեխան iPhone ՞ է ցանկանում․ սմարթ հեռախոսների ազդեցությունը երեխաների զարգացման վրա

Եկեք մի պահ պատկերացնենք թե ինչով կզբաղվի ձեր երեխան, եթե դուք չգնեք iphone, որը նա այդքան շատ է ցանկանում։ Նա դեռ կհասցնի բազմաթիվ սմարթ հեռախոսներ ունենալ, իսկ լիարժեք մանկությու՞ն, երբ պետք է ծառերը մագլցի, ոտնատակ տա ջրափոսերն, ու, վերջապես, հարաբերություններ հաստատի բնության հետ, որպեսզի սեփական փորձով ճանաչի աշխարհը։ Այս հոդվածն այն մասին է, թե ինչ հետևանքների կարող է հանգեցնել երեխաների՝ այդքան վաղ տարիքում էլեկտրոնային տեխնոլոգիաներից կախվածություն ձեռք բերելը։

iPhone կամ այլ սմարթ հեռախոսներ․ քմահաճու՞յք, թե անհրաժեշտույուն

Եթե չափահաս մարդու համար գաջեթները  անհրաժեշտություն են , ապա երեխաների դեպքում դրանք պարզապես քմահաճույք են, որը, շատ հաճախ պետք չէ իրականացնել։ Բջջային հեռախոսի ազդեցությունը երեխայի զարգացման վրա ոչ մի լավ բան չի խոստանում։ Թվային տեխնոլոգիաների չափից ավելի կիրառությունը երեխաներին խոցելի է դարձնում ՝ ազդելով նրանց հոգեկան առողջության ու էմպատիայի ունակության վրա։ Վիրտուալ կյանքը իրական չէ և համացանցում անցկացրած ժամանակը խլում է իրական կյանքի հետ ծանոթանալու այդքան կարևոր և անվերադարձ կորցրած ժամանակահատվածը։ Եթե կարծում եք, թե վաղ տարիքից էլեկտրոնային սարքերի իմացությունը փոքրիկի հետագա հաջողությունների գրավավականն է, ապա պետք է նշել, որ տեխնոլոգիաներն անընդհատ կատարելագործվում են։ Հետևաբար, ոչինչ միանշանակ չէ։

Դիտարկելով բջջային հեռախոսի դերը երեխաների կրթության զարգացման գործում, պետք է ուսումնասիրել մեդալի երկու կողմը։ Հեռախոսների օգտագործումը երեխաների ուսուցման մեջ կարող է արդյունավետ լինել որպես արագ տեղեկատվություն ստանալու աղբյուր։ Չի կարելի ժխտել նաև թվային սարքերի նշանակությունը քովիդ 19-ի ժամանակ, երբ դասերն անց էին կացվում վիրտուալ դասարանում։ Մյուս կողմից էլ կարծես նորից բախվում ենք իրական աշխարհի շոշափելի կրթության և ռոբոտացված տեխնիկայի առավելություններին և թերություններին։ Այն, ինչ նրանք կարող էին գտնել գրադարանում, որտեղ ակամայից հայտնվում ես գրքերի միստիկ աշխարհում, այսօր, արդեն, կարող են գտնել մկնիկի մեկ հպումով։

Հաճախ երեխաները դժգոհում են դասագրքերի ծանրությունից։ Որոշ երկրներ, նույնիսկ, էլեկտրոնային դասագրքերին անցում կատարելու փորձեր են արել, տարբեր մոտոցումներ են փորձարկել։ Մինչդեռ, ինչպես տեսնում եք, անցումը այնքան էլ հեշտ չի ստացվում, քանի որ հարցը ունի նաև անհանգստացնող կողմ․ էլեկտրոնային գրքեր կարդացող երեխաների առողջությունը և մանկավարժական խնդիրները։

Սմարթ հեռախոսնե՞ր, թե առողջ երեխա․․․գիտնականները պարզել են 

Գիտնականները վերջերս են սկսել ուսումնասիրել գաջեթների ազդեցությունը երիտասարդ սերնդի վրա։ 2018 թվ-ին ԱՄՆ կառավարությունը նախաձեռնեց դեռահասների ինտելեկտուալ կարողությունների լայնածավալ ուսումնասիրություն, որին մասնակցում է 9-10 տարեկան տասնմեկ հազար երեխա ամբողջ երկրում։ Նպատակն է՝ պարզել, թե սմարթֆոնների երկարտև օգտագործումն ինչպես է ազդում երեխաների ուղեղի ֆիզիկական կառուցվածքի, նրանց հուզական զարգացման և հոգեկան առողջության վրա։ 300 մլն․ դոլար արժողությամբ ուսումնասիրությունը կտևի 10 տարի։ Վերջերս հեղինակները հրապարակեցին առաջին արդյունքները․ հետազոտությանը մասնակցող երեխաների ՄՌՏ պատկերներն ուսումնասիրելուց հետո, գիտնականները հայտնաբերել են ուղեղի կեղևի վաղաժամ նոսրացում դպրոցականների մոտ, ովքեր օրական ավելի, քան յոթ ժամ էին հատկացնում գաջեթներին։ Փոփոխություններն ազդել են ուղեղի արտաքին հատվածի վրա, որը պատասխանատու է հինգ զգայարաններից ստացված տեղեկատվության մշակման համար։ Սովորաբար, դա տեղի է ունենում մարդու հետ հասուն տարիքում։ Փոփոխությունների պատճառներն ու հետևաքները դեռ պետք է պարզվեն։

Կրկին վերադառնալով երեխա-շրջակա միջավայր հարաբերությանը, պետք է նշել, որ բնության հետ շփումը նաև պաշտպանության միջոց է․ փոքրիկն ավելի դիմացկուն է դառնում պաթոգեն միկրոօրգանիզմների նկատմամբ։ Հողի, ջրի, կենդանիների հետ շփումը նվազեցնում է երեխաների մոտ սթրեսի մակարդակը, ֆիզիկապես և հուզական առումով ավելի հավասարակշռված է դարձնում։

 Հաշվի առնելով այն հանգամանքը, որ երեխան ամեն քայլափոխի բախվում է սմարթֆոնների գայթակղությանը, առաջարկում ենք փոքրիկի առօրյան ավելի արդյունավետ կազմակերպելու մի քանի տարբերակ։ Ստորև կարդացեք այն մասին, թե ինչպես կարելի է երեխային մոտեցնել բնությանը։

Սմարթ հեռախոսնե՞ր, թե սմարթ լուծումներ․ թույլ տվեք երեխային բացահայտել աշխարհը

Ինչ որ բան սիրելու համար, նախ, պետք է իմանալ դա։ Հետևաբար, երեխաներին պետք է սովորեցնել հոգ տանել բնության մասին։ Փորձեք նրանց ավելի հաճախ տանել զբոսայգիներ կամ մոտակա բնական տարածք։ Կվազվզեն, հավանաբար կկեղտոտեն շորերը, բայց կփորձարկեն։ Մոտեցրեք նրանց թռչուններին, ծառերին, միջատներին, հնարավորինս հետաքրքիր տեղեկատվություն հաղորդեք նրանց այն ամենի մասին, ինչը կարող է հետաքրքիր լինել այդ տարիքի երեխային։ Կարող եք միասին ծառ տնկել, ստեղծել ձեր մինի պարտեզը, այնուհետև շարունակել դրա խնամքը միասին։ Թույլ տվեք նրանց դառնալ այդ ամենի մի մասնիկը սեփական ներդրումով։

Այս հոդվածում բանալի բառը <<չափավոր>>-ն է, հետևաբար, եթե, այնուամենայնիվ, որոշել եք գնել սմարթ հեռախոս երեխաների զարգացման համար, ապա ցանկալի է վերահսկել նրա գործողությունները համացանցում և հնարավորինս սահմանափակել գաջեթով զբաղվելու ժամանակահատվածը։